افغان سپینر بالر چې د اسټرالیا بیګ باش لیګ په سږني فصل کې یې د ملبرون رینیګیډز لوبډلې په بریا کې مهم رول درلود، د افغان کرېکټ بورډ سره د قرارداد نه امضا کېدو او د (این او سي) په شرایطو کې د بدلون له امله د اسټرالیا کرېکت لیګ څخه بهر شو.
افغان ورو توپ اچونکی مجیب الرحمن د سه شنبې ورځې لوبه کې د ملبرون سټارز پروړاندې د میلبرون رینګیډز راتلونکو لوبو کې له بیګ باش لیګ څخه د نوموړي د (این او سي) په شرایطو کې د بدلون له امله پاتي شو.
مجیب الرحمن د افغانستان د افغان لوبډلې دوه تیزو بال اچوونکو نوین الحق او فضل الحق فاروقي په ګډون د مرکزي قرارداد نه لاسلیک کولو له امله د افغانستان د کرېکټ بورډ له لوري په لیګونو کې د لوبېدو دوه کلن بندیز سره مخ شو.
هغه مهال د ملبرون لوبدلې په یوه خبرپاڼه کې ویلي وه چې «د بیګ باش لیګ هیڅ اړیکه نه ده ترلاسه کړې چې په لیګ کې د مجیب الرحمن د لوبېدو پلانونه بدل شي. او ملبرون لوبډله په بیګ باش لیګ پاته فصل لپاره د هغه ملاتړ ته دوام ورکوي.»
خو ملبرون لوبډلې تیره ورځ په یوه تازه خبرپانه کې ویلي چې،« مجیب الرحمن د هغه د این او سي په شرایطو کې د بدلون له امله د لوبډلې له نوملړ څخه ایستل شوی.»
دا په داسې حال کې ده چې تېره اونۍ د افغانستان کرېکټ بورډ د کرېکټ ملي لوبډلې درې لوبغاړي د مرکزې قرارداد نه امضا کېدو له امله یو کال په ملي لوبډله کې او دوه کاله په بهرنيو لیګونو کې پر لوبېدو بندیز ولګاوه.
خو درې ورځې وړاندې د افغانستان کرېکټ بورډ له متحده عربي متحده امارتو سره د درې شل اوریزې لوبلړۍ پر مهال له بندیز سره مخ دوه افغان لوبغاړي ولوبول او ویلي یې دي چې له بندیز سره مخ لوبغاړي کولای شي د ضرورت پر مهال د افغان ملي لوبډلې لپاره ولوبیږي.
خو په بهرنیو لیګونو کې د لوبېدو د بندیز په اړه یې څه نه دي ویلي.
