جیو نیوز شبکې راپور ورکړی، طالبانو پرېکړه کړې چې نړۍوالې الوتکې د افغانستان هوایي حریم ته تر ننوتو مخکې باید له دوی څخه اجازه واخلي چې له همدې امله د یو شمېر هوایي شرکتونو الوتکې د پاکستان فضا کې له ځنډ سره مخ شوې دي.
ځایي سرچینې وایي، چې د کونړ ولایت د شیګل ولسوالۍ په تخت خور سیمه کې د افغانستان او پاکستان د سرحدي ځواکونو تر منځ نښته کې دوه طالبان وژل شوي دي. دا په داسې حال کې ده، چې تر دې وړاندې له دانګام څخه د پرلهپسې نښتو راپورونه ورکړل شوي وو.
د پاکستان د سمندري چارو مرکزي وزیر محمد جنید انور چودري د افغانستان د ټرانزیټي مالونو د دویمې سوداګریزې بېړۍ د ګوادر بندر ته رسېدل، د افغانستان او پاکستان ترمنځ د اقتصادي اړیکو د پیاوړتیا لپاره یو مهم پرمختګ وباله.
د طالبانو مشر ملا هبت الله اخوندزاده د کندهار په یوه دیني سیمینار کې چې د طالبانو د جهادي مدرسو د مسوولینو، استادانو او لوړو زده کړو وزارت سرپرست پکې ګډون کړی و، ویلي، چې بې اعتمادي د بې اطاعتۍ لامل کیږي او بې اطاعتي د اختلافاتوسبب کیږي.
د پاکستان د سمندري چارو وزیر ویلي، چې هڅه کوي د افغانستان لپاره د ګوادر بندر له لارې نړیوالو بازارونو ته د لاسرسي نوی فرصت چمتو کړي.
د ځايي سرچینو د معلوماتو له مخې، د کونړ په دانګام ولسوالۍ کې د طالبانو او پاکستاني ځواکونو ترمنځ نښتې شوي دي. سرچینو ویلي، چې د تېرو دوو ورځو راهیسې په وقفه یې ډول د دواړو لوریو ترمنځ د درنو او سپکو وسلو ډزې تبادله کیږي.
د غزني ولایت لپاره د طالبانو د اطلاعاتو او کلتور رییس وایي، چي د دې ولایت له موزیم څخه اته قلمه تاریخي اثار د قطر نړیوال نندارتون ته لېږدول کیږي. ملا حمیدالله نثار زیاتوي چې دا اثار د اسلامي تمدن سره تړاو لري او دا به د افغاستان د تاریخي ارزښتونه استازیتوب وکړي.
د افغانستان د پخوانۍ ولسي جرګې مرستیال عبدالظاهر قدیر ته نږدې سرچینو افغانستان انټرنشنل ته وویل چې نوموړي ته د استناف غوښتنې لپاره د کینیا محکمې یوه میاشت وخت ورکړی دی. دوی زیاتوي په دې موده کې به ظاهر قدیر محکمې ته د لګېدلو تورونو د سپیناوي لپاره مستند سندونه وړاندې کوي.
د طالبانو د عامې روغتیا وزارت ویلي، چې په ایران کې یې د ماشومانو د ناروغیو د درملنې له دوو مشهورو روغتیايي مرکزونو سره د افغان ډاکټرانو د روزنې او همکارۍ پر احتمالي هوکړه خبرې کړې دي.
د ایران پولیسو خبر ورکړی چې د یوې افغان کډوالې کبرا رضايي قاتل یې نیولی دی. د تهران ولایت د پیشوای ولسوالۍ د پولیسو قوماندان اکبر عربي زیاته کړې چې له پوښتنو ګروېږنو وروسته، دې سړي پر جرم اعتراف کړی او دا مهال په زندان کې دی.
د امریکا په کلاهوما ښار کې فدرالي محکمې یو ۲۷ کلن افغان د داعش سره د اړیکو او په دوو ترهګریزو جرمنو مجرم وپېژند. محکمې ویلي، چې د ناصر احمد توحيدي په نوم دغه افغان خپل جرمونه منلي او د داعش سره د مالي همکارۍ په تور نیول شوی.
د بشري حقونو د څار سازمان ویلي، چې د افغانستان لپاره د ملګرو ملتونو ځانګړي راپور ورکوونکي رېچارډ بېنېټ په خپل وروستي راپور کې یوځل بیا د بشري حقونو د سرغړونو لپاره د یوې خپلواکې ادارې د جوړېدو غوښتنه کړې ده.
د پولیټیکو د راپور له مخې، د جرمني د نوې حکومت له خوا د کډوالو د بیا مېشتولو د پروګرام ځنډول زرګونه افغانان چې په پاکستان کې بند پاتې دي، له یو ناڅرګند او خطرناک برخلیک سره مخ کړي دي.
د طالبانو تر واک لاندې د ټرافيک پوليسو لوی رياست خبر ورکړی، چې د لوی اختر په ورځو کې په ټرافيکي پېښو کې ۴۳ کسان مړه او تر ۱۵۰ ډېر ټپیان شوي دي.
د فنلنډۍ رسنیو د راپورونو لهمخې؛ د فنلنډ د کډوالو شورا د حمیرا په نوم د دغه هېواد د ټامپیر ښار یوه افغانه اوسېدونکې د «۲۰۲۵ کال د غوره کډوالې» په توګه نومولې ده.
د افغانستان د ښځو د مدنې ټولنو او بشرې حقونو د بنسټونو غړې په ایران کې د افغانې کډوالې کبرا رضايي وژنه غندلې او د عدالت غوښتنه یې کړې. افغانې فعالانې دا پېښه «جنایت» ګڼلی او د عاملینو پر محکمه کېدو يې ټينګار کړی.
د امریکا د سمندري ځواکونو یوه پخواني سرتېري خبرداری ورکړی چې د افغانانو لپاره د لنډمهالي خونديتوب پروګرام یا ټيپياېس له پای ته رسېدو سره، ښايي د امریکايي ځواکونو د ګڼ شمېر پخوانیو افغان همکارانوژوند له ګواښ سره مخ شي.
د افغانستان له هوایي ډګره د امریکايي ځواکونو د وتلو انځورونه لا هم د ډېرو خلکو په ذهن کې پاتې دي، خو دا ځل، د کلېفورنیا والي ګوین نیوسم په لاس انجلس کې د سرتېرو انځورونه د اوسني وضعیت د ښودلو لپاره خپاره کړل، چې وروسته د مصنوعي ځیرکتیا په تېروتنه د افغانستان له پېښو سره وتړل.
برېټانیا یوې افغانې مېرمنې ته چې په افغانستان کې یې د ښځو د حقونو د ملاتړ لپاره کار کاوه، په دغه هېواد کې د ژوند کولو اجازه ورکړې ده. هغه پخوا د برېټانیا د کډوالۍ ادارې لهخوا رد شوی وه، خو اوس یادې ادارې خپله پرېکړه بدله کړې او پناه یې ورکړې ده.
سرچینو افغانستان انټرنشنل ـ پښتو ته ویلي، چې له تېرې يوې اونۍ څخه ۴۰ ورځنۍ په زړه ناروغ افغان ماشوم د حیات اباد په روغتون کې له سخت حالت سره مخ دی. د ماشوم کورنۍ ته د اسنادو د نه درلودلو له کبله پر تورخم اجازه نه ورکول کېده او ماشوم یې د تداوی لپاره یو نابلده کس ته ورکړی.
له پاکستان نه د افغان کډوالو د ايستلو پر دوام، د دغه هېواد حکومت زرګونه افغان کورنیو ته ډېره لږه موده وخت ورکړی چې خپل کورونه پرېږدي او افغانستان ته ستانه شي. یوه افغان ته یوازې ۴۵ دقیقې وخت ورکړل شوی چې پاکستان پرېږدي.
د طالبانو د کورنیو چارو وزیر ویلي، چې ملت باید د اسلامي او ملي ګټو لپاره متحد پاتې شي ځکه د اصلي اهدافو هېرولو له امله افغانستان هر ځل له بحران سره مخ شوی دی. سراج الدین حقاني وايي، افغانستان په افغانیت او اسلامیت نه دی وران شوی.