د افغانستان د رسنیو د ملاتړ سازمان په پاکستان او ایران کې له مېشتو خبریالانو سره په انلاین غونډه کې، یو ځل بیا له پاکستان او ایران څخه غوښتي چې د افغان خبریالانو جبري اېستل دې ودروي.
د طالبانو د کورنیو چارو وزارت د نشه یې توکو پر وړاندې د مبارزې معینیت د شنبې په ورځ د یوې خبرپاڼې په خپرولو سره ویلي، چې د هلمند په مرکز لښکرګاه او څو ولسوالیو کې د تېرو پنځه میاشتو عملیاتو پرمهال نیول شوي ۹۴۶۱ کیلو ګرامه نشه يي توکي یې سوځولي دي.
د طالبانو د پوهنې وزارت مالي او اداري مرستیال مولوي صبغتالله وثیق وایي چې ډېر ژر به په کابل کې د سیدجمالدین عالي لیسه بااستعداده زده کوونکو لپاره ځانګړې کړو. نوموړي دا څرګندونې د سمیعالله په نوم د ریاضي په برخه کې د ځانګړي استعداد لرونکي ماشوم د ستاینې په غونډه کې وکړې.
د طالبانو د امربالمعروف وزارت ویاند وايي، د ملګرو ملتونو د ښځو د څانګې وروستۍ راپور بې اساسه دی او په هېواد کې د ښځو حقونه خوندي دي. تېره ورځ د ملګرو ملتونو د استوګنې او ښاري پراختیا ادارې مشرې ویلي و د ښځو په تړاو د طالبانو فرمانونه د راستنېدونکو ښځو پر وړاندې جدي ننګونې دي.
د اسټرالیا د نیو ساوت وېلز ایالتي پارلمان د دغه ایالت د نجونو د فوټبال د یوې لوبډلې افغان روزونکی مصطفی مهمند د غوره خدمتونو له امله ستایلی دی. مهمند په ۲۰۲۱ کال کې اسټرالیا ته کډوال شوی او د ۲۰۲۵ روان په پیل کې د استرالیا د ۱۳ کلونو نجونو کلپ د روزونکي په توګه ټاکل شوی دی.
د طالبانو د مالیې وزارت ویلي، چې د تورخم، ډنډپټان، خوست، غلام خان بندر، نیمروز او د ګمرکونو لوی ریاست د لابراتوار په څانګه کې یې ۲۱۵ امنیتي کامرې لګولې دي. وزارت زیاتوي چې ډېر ژر به دا کامرې په کابل کې د ګمرکونو لوی ریاست سره هم ونښلوي.
په کابل کې د سیاحتي او زیارتي شرکتونو ټولنې نن شنبه (د زمري ۱۸مه) ویلي، چې له کړو ژمنو سره سره لاهم ایران او عراق د اربعین مراسمو زیارت کوونکو ته ویزې نه دي ورکړي.
افغانستان کې د ټرافيکي پېښو پر دوام؛ نن او پرون په هلمند، بلخ، کندوز او بدخشان ولایتونو کې د موټرو د اوښتو او ټکرونو له امله ۹ کسان مړه او ۹ نور ټپيان شوي دي.
د طالبانو د بهرنیو چارو وزارت نن شنبه (د زمري ۱۸مه) د غزې د بشپړ کنټرول په اړه د اسراييل د کابینې پرېکړه غندلې ده. د دغه وزارت لهخوا په خپرې شوې خبرپاڼه کې راغلي، چې دغه پرېکړه د اندېښنې وړ ده او دا کار به د فلسطیني ملت پر وړاندې شته کړکېچ لا پراخ کړي.
د ملګرو ملتونو د استوګنې اداره (UN-Habitat) وايي، افغانستان په بېسارې توګه د کډوالو د جبري ستنولو له کړکېچ سره مخامخ دی او تر نیمايي زیات د ستنېدونکو کسانو عمرونه تر ۱۸ کالو کم دي.
په افغانستان کې د ښځو د نیونو، ځپنو او پر وړاندې یې د پراخو بندیزونو سره هممهاله؛ د طالبانو د امر بالمعروف، نهې عن المنکر او شکایتونو اورېدو وزارت وایي، چې د دغه وزارت محتسبینو د هرات ولایت په ادرسکن ولسوالۍ کې د یوې ۱۱ کلنې نجلۍ د جبري نکاح مخه نیولې ده.
د امریکا مرکزي استخباراتو یا سيایاې پخوانۍ ماموره سارا اډمز وایي، چې حبيبي تېر کال طالبانو القاعده شبکې ته سپارلی او اوس تر سختو شکنجو لاندې دی. هغه وایي، د امريکايي چارواکو دغه خبره ناسمه ده چې د هغه په اړه هیڅ معلومات نهلري.
د پاکستان د پلازمینې اسلاماباد په افغان مېشتو ښارګوټو کې د پولیسو له لوري د افغانانو د نیولو لړۍ بیا زور اخیستی. دې سره جوخت په اسلاماباد کې افغان کډوال شکایت کوي، چې اوسمهال په دغه ښار کې د افغانانو نیونه پولیسو ته د عاید سرچینه ګرځېدلې.
د پاکستان د بهرنیو چارو وزارت د طالبانو د اوبو او برېښنا وزیر عبداللطیف منصور د وروستیو څرګندونو په اړه وايي، چې اسلاماباد په افغانستان کې د یوه پیاوړي حکومت غوښتونکی دی او په دې تړاو منفي څرګندونې بېبنسټه دي.
د افغان ښځو د سیاسي مشارکت شبکې په افغانستان کې د جمهوري نظام د رانسکورېدو او د طالبانو د بیا واکمنېدو د څلورمې کلیزې په درشل کې د ۲۰۲۱ کال د اګست ۱۵مه د هېواد په تاریخ کې یوه توره او شومه ورځ بللې، او وایي چې افغان ولس طالبان خپل استازي نه ګڼي.
د پاکستان بهرنیو چارو وزارت ویاند «شفقت علي خان» وایي چې اسلام اباد ته د طالبانو د بهرنیو چارو وزیر امیر خان متقي د سفر پر نېټې لا تراوسه هوکړه نده شوې، خو کار پرې روان دی.
د طالبانودټرانسپورټ او هوايي چلند وزارت تازه اعلان کړی، چې له دې وروسته به د سړک او لوی لارو د ټرانسپورټ فیسونه یا حقالزحمه په برېښنايي ډول راټولېږي. دغه وزارت وايي، د نغدو پیسو اخیستل بند شوي او دا نوی بهیر یې په کابل کې د یو منظم بانکي سیسټم له لارې پیل کړی دی.
د پاکستان بهرنیو چارو وزارت وايي، د پاکستان او طالبانو تر منځ اړیکې د سفیر تر کچې لوړې شوي، خو په وینا یې لا تر اوسه په اسلام اباد کې د طالبانو د بیرغ په تړاو څه پرېکړه نه ده شوې.
یو شمېر هغه افغان پوځیان چې د ناټو د شتون پر مهال یې له بریتانوي پوځ سره همکاري کړې وايي، چې له کلونو انتظار وروسته د بریتانیا حکومت د دوی د لېږد غوښتنې رد کړې دي. ځينو پخوانیو افغان نظامیانو په یوه اعلامیه کې ویلي:«انساني ژوند باید د نورو د خپل سرو پرېکړو په تمه پاتې نه شي.»
ملګرو ملتونو له ګاونډیو هېوادونو د ستانه شویو افغان کډوالو د وضعیت په تړاو د اندېښنې په څرګندولو سره ویلي، راستنېدونکي افغانان د طالبانو د واکمنۍ لاندې داسې یوه هېواد ته ستنېږي، چې پکې شاوخوا نیمايي نفوس د اقتصادي، بشري حقونو او د اقلیمي کړکېچونو له امله بشري مرستې ته اړتیا لري.
په ننګرهار کې د کرېکټ د یوې اکاډمۍ لوبغاړی لقمان شېرزاد نن (جمعه د زمري۱۷مه) په لغمان کې د لامبو وهلو پر مهال مړ شوی دی.
مارګریتا، یوه ۳۳کلنه الماني ګرځندوې، په ټولنیزو رسنیو کې له محرم پرته، د طالبانو تر واک لاندې افغانستان د خپل درې میاشتني سفر ویډیوګانې خپروي، چې دا کار یې له سختو غبرګونونو سره مخ کړی دی.