نړۍ

د ملګرو ملتونو د هواپېژندنې سازمان (WMO) څېړنیز راپور کې راغلي، چې له تېر کال راهیسې د اقلیمي بدلون او تودوخې ډېرېدو له امله هوا ککړه شوې ده. د دغه څېړنیز راپور له مخې؛ لکه څنګه چې نړۍواله تودوخه د هوا د پېښو بڼې بدلوي، دغه ډول اورلګېدنه هم وسره ډېره شوې ده.

د عراق امنیتي بنسټونه وايي، چې د اوږدمهالي عملیاتو په پایله کې یې د داعش وسله‌والې ډلې یوه ملاتړکوونکې شبکه له‌منځه وړې ده. د دغه بنسټونو په وینا؛ دغې شبکې داعش ته ځواکونه او مالي سرچینې لېږدولې.

د ایران په پلازمېنه تهران کې د ناورین مخنیوي او مدیریت ادارې له خپلو خلکو غوښتي، چې تل باید د احتمالي زلزلې لپاره چمتو اوسي. د دغې ادارې مشر علي نصیري ویلي، چې د تهران ټولې کورنۍ باید په خپل کور، موټر یا کارځای کې د «خوړو کڅوړې» چمتو ولري.

د هند له‌خوا د راخوشې شویو اوبو له امله د ستلج سیند په ګنډا سېنګ والا سيمه کې د اوبو کچه خورا لوړه شوې او شاوخوا ۳۰ زره متره مکعبه پورې ثبت شوې ده، چې له امله یې څو بندونه مات شوي دي. دغه ډول په ملتان کې هم لسګونه کلي تر اوبه لاندې شوي دي.

د حماس ډلې یو پلاوي د پنجشنبې ماښام په قطر کې د ایران د بهرنیو چارو له وزیر عباس عراقچي سره لیدلي دي. په دغه لېدنه کې د حماس ډلې غوښتي، چې نړۍ باید د فلسطینيانو لپاره د بېړنیو بشري مرستو د لېږلو، د نسل‌وژنې او د جګړې د ختمولو په برخه کې یو موټی شي.

اسراييلي پوځ ویلي، چې د غزې ښار ۴۰ سلنه برخه یې نیولې او عملیات به نور هم پراخ کړي. د اسراییل دغه عملیاتو سره هم‌مهاله په غزه کې ګڼ خلک د خپلو کورونو پرېښودو ته اړ شوي. د غزې روغتیايي چارواکي وايي، په دغه چاڼیزو عملیاتو کې یوازې د پنجشنبې په ورځ لږ تر لږه ۵۳ کسان وژل شوي دي.

د پاکستان په پنجاب او سند ایالتونو کې د وروستیو سېلابونو له امله د مړو شمېر ۸۸۴ ته رسېدلی، ۴زره کلي تر اوبو لاندې شوي او نږدې ۸۰۰زره خلک بې‌ځایه شوي دي.

د پاکستان لومړي وزیر شهباز شریف د ټولو خنډونو د لرې کولو د ژمنې ترڅنګ د چین له سوداګریزو شرکتونو سره د ۴.۲ میلیارده ډالرو په ارزښت تړونونه هم لاسلیک کړل. شریف د چین او پاکستان کنفرانس د «فولادي ورورولۍ» انعکاس وباله.

د ډنمارک د کډوالو شورا مشرې د طالبانو د کډوالو چارو له وزیر مولوي عبدالکبیر سره په لیدنه کې غوښتنه وکړه، چې د بشري مرستو د پر وخت رسولو لپاره باید اداري چارې ساده شي. چارلت سلنته وویل: «د لنډمهاله مرستو ترڅنګ باید د کډوالۍ د کړکېچ د حل لپاره دایمي حل‌لارې هم ولټول شي.»

د امریکا ولسمشر ډونالډ ټرمپ وايي، چې د شکونو سره، سره نوموړی لاهم د روسیې او اوکراین ترمنځ سولې ته د رسېدو لپاره هڅه کوي.

د یمن حوثي وسله‌والې ډلې ویاند یحیی السریع اعلان وکړ، چې دې ډلې په بیت‌المقدس او حیفا ښارونو کې د اسراییلي پوځ پر مهمو اهدافو دوه بریالي بریدونه کړي دي.

د امریکا د بهرنیو چارو وزارت په یوې ګډه اعلامیه کې ویلي، چې دغه هېواد د قطر، توګو او د افریقایي اتحادیې د کمېسیون له استازو سره یو ځای د «کانګو او رونډا» سولې تړون د څار ګډې کمېټې په دویمه غونډه کې برخه اخیستې ده.

حماس ډلې د امریکا د ولسمشر ډونالډ ټرمپ د هغې غوښتنې په ځواب کې چې ۲۰ تنه اسراییلي یرغمل شوي دې سمدستي خوشې کړي، وویل چې دوی د غزې په تړاو یوې جامع هوکړې ته چمتو دي، ترڅو ټول یرغمل شوي کسان خوشې شي.

د برېتانیا حکومت پرېکړه کړې، هغه ۷۰۰۰ افغان کډوال مني چې پخوا یې په افغانستان کې د دې هېواد له ځواکونو سره د سیمه ییزو همکارانو په توګه کار کړی دی. دا پرېکړه په داسې حال کې شوې، چې برېتانیايي چارواکي تر اوسه دې وروستۍ پایلې ته نه دي رسېدلي چې د دې کسانو د منلو لګښت به څومره وي.

د فرانسې حکومت د هغې اسلامي دیني مدرسې د تړلو اعلان کړی، چې د امامانو د روزنې لپاره جوړ شوی و. چارواکي وایي، دغه مدرسه یې «وسله‌وال جهاد» ته د مشروعیت ورکولو په تور تړلې ده.

یوې هالنډۍ محکمې پرېکړه کړې چې حکومت باید هغه ۴۲ افغان ساتونکي، چې د طالبانو د واکمنۍ پر مهال یې په کابل کې د هالنډ سفارت ساتنه کوله، د هغوی له کورنیو سره یو ځای امسټرډام ته ولېږدوي.

د اروپايي ټولنې د بهرنۍ او امنیتي تګلارې جګپوړې استازې کایا کلاوس د چارشنبې په ورځ وویل چې د چین، روسیې، ایران او شمالي کوریا مشران چې په بېجينګ کې د پوځي پرېډ پر مهال یو ځای راښکاره شول، د «استبدادي ایتلاف» استازیتوب کوي، چې د اصولو پر بنسټ د نړیوال نظم پر وړاندې ننګونه ده.

د غزې روغتیا وزارت وایي، چې د سې‌شنبې له سهار راهیسې پر غزې د اسراییل په بریدونو کې لږترلږه ۱۰۵ فلسطینیان وژل شوي دي. په وژل شویو کسانو کې مرستو ته په تمه ۳۲ کسان هم شامل دي.