د اټومي انرژۍ د نړۍوالې ادارې مشر رافایل ګروسي وایي، که څه هم د امریکا او اسراییل د بریدونو له امله د ایران اټومي تاسیساتو ته زیان رسېدلی، خو ښایي تهران وکولای شي په څو میاشتو یا ان تر هغه کم وخت کې د غني شویو یورانیمو تولید بیا پیل کړي.
په منځني ختیځ کې د اسراییل او ایران تر منځ د څه کم دوه اوونیزې جګړې او د ایران پر اټومي تاسیساتو د امریکا له بریدونو وروسته په سیمه کې د امریکايي ځواکونو د خوندینې د څرنګوالي په تړاو اندېښنې ډېرې شوې دي.
د هند د بهرنیو چارو وزارت د پاکستان د پوځ هغه تور رد کړی، چې د شمالي وزیرستان د ځانمرګي برید مسوولیت یې پر ډیلي ور اچولی و. دغه وزارت په یوې خبرپاڼه کې ویلي: «موږ د پاکستان د پوځ هغه خبرپاڼه لېدلې چې هڅه کوي د جون د ۲۸مې د برید مسوولیت پر هند واچوي. موږ دا ادعا په کلکه ردوو.»
روسیې د اوکراین د سوېلي ښار اوډیسا په یوه ۲۱ پوړییزه استوګنیزې ودانۍ د بېپیلوټه الوتکې برید کړی، چې په پایله کې یوه مېرمن او مېړه وژل شوي او لږ تر لږه ۱۴ تنه نور ټپیان شوي دي.
د امریکا د استخباراتو مخکېنۍ مامورې سارا اډمز د داعش، القاعدې او د ټي ټي پي د لوړپوړو غړو یو توملړ خپور کړی او ادعا یې کړې، چې هغوی دا مهال په افغانستان کې حضور لري. نوموړې ویلي، چې د تحریک طالبان پاکستان مشر په کابل کې دی او د اسامه بن لادن زوی سعد بن لادن لا هم ژوندی دی.
د ترکیې د بهرنیو چارو وزیر وایي، چې د ایران او امریکا تر منځ باید یوه هوکړه وشي. نوموړي ویلي، چې که امریکا له تهران سره د اټومي پروګرام تر څنګ نور موضوعات مطرح کوي، نو ښایي ایران خبرو ته چمتو نه شي.
د امریکا ولسمشر ډونالډ ټرمپ په سپینه ماڼۍ کې د کانګو او روانډا ترمنځ د سولې هوکړې د لاسلیک مراسمو پرمهال یوې خبریالې ته غیرمعلومي شخصي څرګندونې وکړې. هغه په دې مراسمو کې د وینا پر مهال یوې خبریالې ته مخ واړو او وې ویل ته ښکلې یې.
العربیه رسنۍ د خپلو سرچینو له قوله راپور ورکړی، چې امریکا پر نتنیاهو فشار راوړي څو په غزه کې اوربند ته غاړه کېږدي. یادې رسنۍ ته د اوربند منځګړو مصري سرچینو ویلي، چې د اوربند په تړاو به ډېر ژر د خبرو نوی پړاو پیل شي.
د خېبر پښتونخوا د شمالي وزیرستان د میرعلي ولسوالۍ په خدي سیمه کې د یوه ځانمرګي برید په ترڅ کې پنځه پاکستاني پوځیان وژل شوي او اته نور ټپیان دي.
د امریکا د فدرالي څېړنو ادارې (اېف بي ای) تر پلټنو وروسته د واشنګټن پوسټ ورځپاڼې یو خبریال د «ماشوم د غیر اخلاقي انځورونو» د لرلو په تور نیول شوی او په موقتي توګه له دندې هم ایستل شوی دی.
د پاکستان د بهرنیو چارو وزیر اسحاق ډار یو ځل بیا د پاکستان پر دريځ ټينګار وکړ، چې اسرایيل به تر هغې په رسمیت ونه پېژني تر څو چې د فلسطين د مسلې د حل لپاره دواړه هېوادونه حل لارې ته ونه رسيږي. نوموړي ویلي، چې فلسطین باید یو خپلواک، د بقا وړ او پر ځان بسیا دولت اوسي.
د روسیې ولسمشر ولادیمیر پوتین د جمعې په ورځ خبریالانو ته وویل، چې روسیه له اوکراین سره د جګړې په اړه د سولې درېيم پړاو خبرو ته چمتو ده؛ خو دا يې ونه ویل، چې نوموړی به په دې خبرو کې مستقیم برخه واخلي که نه.
د ولسمشر ډونالډ ټرمپ دویم زوی، اریک ټرمپ، ویلي چې د دوی کورنۍ ښايي په راتلونکو کلونو کې د څو نسلونو لپاره په سیاسي ډګر کې پاتې شي، ځکه هغه او نور خپلوان یې ښايي د عامه دفترونو لپاره ځانونه نوماندان کړي.
د سویلي کوریا پولیسو ویلي، چې شپږ امریکایي وګړي یې نیولي، چې هڅه یې کوله ۱۶۰۰ پلاستيکي بطری، چې پکې وریجې، ډالر او انجيل وو، د «ګانګوا» ټاپو له لارې شمالي کوریا ته واستوي. چارواکي وايي، دا کسان د طبيعي پېښو او خونديتوب د قانون د نقض له امله تر پوښتنو لاندې دي.
د اروپايي اتحادیې ۲۷ غړو هېوادونو مشرانو د پنجشنبې په ورځ د بروکسل په ناسته کې د روسیې پر ضد بندیزونه د شپږو نورو میاشتو لپاره وغځول. اروپايي اتحادیې د روسیې له لوري پر اوکراین تر برېد وروسته تردې دمه پر روسیې ۱۷ بندیزونه لګولي دي.
فاکس نیوز د فدرالي سرچینو په حواله راپور ورکړی، د امریکا د کډوالۍ ادارې تېره اونۍ په بېلابېلو ایالتونو کې ۱۳۰ تنه ایراني وګړي نیولي دي چې له دې سره د نیول شویو ایرانیانو شمېر ۶۷۰ کسانو ته لوړ شوی دی.
د ایران د بشري حقونو د فعالانو شبکې هرانا د جمعې په ورځ د (چنګاښ ۶مه) یو تفصیلي راپور خپور کړی، چې په کې د اسراییل لهخوا پر ایران د ۱۲ورځنيو بریدونو د مرګ ژوبلې او اوښتو زیانونو شمېرې ثبت شوې دي.
د هند د جېپور په راجستان سیمه کې پولیسو یو پلار له خپلو دوو کمعمره لوڼو د جنسي ځورونې په تور ونیوو. د هندوستان ټایمز په راپور کې راغلي، دغه دردونکې قضیه هغه مهال روښانه شوه؛ کله چې د نجونو مور په خپل خاوند شکمنه شوه او له اړوندو ادارو سره یې اړیکه ونیوله.
جاپان هغه کس اعدام کړ، چې د خواله رسنۍ له لارې د نهو کسانو د وژلو په قضیه کې مجرم پېژندل شوی و. تاکاهیرو شیرایشي ټوکیو ته چې د 'ټویټري قاتل' په نوم هم مشهور دی؛ د اتو ښځو او یو سړي د وژنې په تور د مرګ سزا اورول شوې وه.
د پاکستان اېکسپرېس ټربیون ورځپاڼې راپور ورکړی، چې د دغه هېواد په پنجاب ایالت کې د موسمي بارانونه له امله په بېلابېلو پېښو کې ۷ کسان مړه او ۴۶ نور ټپیان شوي دي.
د اروپایي ټولنې یوه چارواکي د جون پر ۲۶مه تایید کړې چې د روسیې پر ضد به اوسني بندیزونه شپږ میاشتې نور هم وغزوي. د پولنډ صدراعظم ډونالډټاسک هم دا پرېکړه رسما تایید کړې ده.
د اوکراین د پوځ استخباراتي ادارېویلي چې ځانګړو بېپېلوټه الوتکو یې د روسیې تر ولکې لاندې کریمیه کې د «S-400» هوايي دفاعي سیستم مهمې برخې زیانمنې کړي دي.